受惠於澳門金沙條數靚靚，澳門賭股昨日繼續前日升勢，其中最矚目就係股價低殘已久的奧瑪仕（959），勁升22.97%。
奧瑪仕成交量勁抽，但經紀陳就堅持話莫沾手，佢話舊年主力炒作奧瑪仕嗰班大佬，家陣個個身家豐厚，如果佢哋肯落場炒作，水源自然充足，場面可以好熱鬧，但睇番公司本身基本因素，早排公布業績未見希臘神話賭場有盈利貢獻，而原先一直做開嘅電子產品生意只係一般，財政又唔係強勁，所以無謂亂咁撲入去做大戶點心。
經紀陳又話，濠賭股買大好過買細，澳門股炒風一起，成班證券行又會出嚟唱好，但唱好目標唔會多，估計主要都係小賭王嘅新濠國際（200）。
早排人人都話過濠江搞賭股，到最後自然係汰弱留強，作為澳門賭王嘅公子，自然絕對優勢。另外，新濠稍後會預售澳門CityofDreams項目嘅服務式住宅，係另一項盈利增長動力。
新濠收10.10元，升5.21％，成交1.62億元。
慕容小初