港股繼續在高位整固，由於市底好強，大藍籌雖已大升，但未見有太大的沽壓，大部份時間在窄幅內上落，恒指收市跌6點，報15111。
大市今個浪升得急，升軌甚斜，若能出現一次有三數百點的調整，後市升勢可更為健康。大戶經長時間的收集部署，一發新攻勢，呢個浪已經升到令好多人跌眼鏡，後市更可以升到你唔信，家吓保守估計嘅目標係16000，但已有人睇17500。
大市整固期間，未起過嘅二三線股會接力而上，噚日賭股繼續有好表現。
滙漢系全面發力，滙漢（214）收2.60元，升7.2%，泛海國際（129）收0.395元，升6.7%，泛海酒店（292）收1.40元，升9.3%；3股成交俱大增。
樓市轉旺，酒店好景，滙漢又撇乾撇淨，全系升得有理。滙漢早已作推介（當時股價2.40元），其每股資產淨值8.54元，股價遲早會一飛沖天；至於泛海，無論業績同資產，都一樣好吸引，且近期會有新盤開售，炒番轉，係佳選。
股價折讓逾60%
泛海位於鯉魚門、總樓面19萬方呎的商住項目（住宅佔13.3萬方呎），計劃月內開售，呢個盤10多年前購入，連同去年補地價1.92億元，平均每方呎約2000元，連同建築費1000元，售價保守計5000元，每呎賺2000元，單係住宅部份已可獲利2.6億元。泛海有發展中土儲約110萬方呎，現年度尚有新界屏山的低密度住宅項目開售，總樓面4.3萬方呎，估計獲利數千萬元。
酒店業務收益直線上升，泛海佔有泛店70%權益，05年度（3月年結）應佔盈利6300萬元，現年度房租平均上升50%，估計應佔盈利可大升到1.2億元。
投資物業方面，泛海持有44萬方呎的辦公室及零售樓面，去年度租金收入約6000萬元，今年部份簽新租約，租金上升。現年度，估計泛海盈利約3億元，每股盈利6仙，PE9倍計，股價可見0.54元。
連卡佛大廈19萬方呎標售23億元，對面的泛海大廈13萬方呎也應值14.5億元，泛海現時市值不足20億元，一幢大廈已等於市值的7成，泛海3月結時每股資產淨值0.84元，若計入物業升值，股價折讓起碼超過60%，同滙漢一樣咁吸引。
郭兆誠