本田（Honda）最近發布咗新一代Civic嘅相片，並且預告喺06年1月推出。從廠方嘅相片所見，主打型號係5門揭背版，外觀同車廂內櫳都極盡前衞，睇嚟廠方好有信心改善新一代車系嘅銷量，以抗衡豐田Corolla。
記者：袁國基
放棄用1.5公升引擎
一直以嚟Civic嘅1.5公升引擎版本都係銷售主力，但呢代會改以1.4同1.8公升引擎作為主打，而且唔再以高性能為賣點，改為以環保做大方向。廠方聲稱二氧化碳排放量係同級最低，馬力輸出方面，1.4公升引擎配有i-DSI系統，最大馬力有83ps，而1.8公升版就用i-VTEC系統，最大馬力有140ps。新Civic嘅車身造型由本田英國設計室負責，車頭有啲Odyssey影子，車尾形狀比一般揭背車傾斜，而尾燈又同車頭燈互相呼應，好有概念車味道。廠方表示，除5門揭背外，重會有3門揭背版，不過後者只會喺歐洲本土發售。
6前速波箱做標準
新一代Civic喺懸掛系統同傳動系統都有革命性改變，前懸掛保留獨立支柱式，而後懸掛就由雙搖臂改為扭力桿，咁做可以將懸掛系統結構縮小，令車廂空間更大，而且無論係1.4或1.8版本，6前速手波已經係最基本嘅設定，1.8版本更加可以另外選擇6前速加減波，提升操控感。