由SONY宣布開放Firmware2.0（韌體）後，各大小PSP討論區就開始出現熱烈發言，皆因新版Firmware為PSP作出超過19項改良，當中重包括好多機迷期待嘅上網瀏覽器同換壁紙功能！討論區上更出現大量情報交流、甚至倒數下載日嘅Post，Firmware嚟講可算前無古人！
文：徐影龍（[email protected]）
支援韓文仍欠中文
由於PSP機能強勁，外國破解專家爭相為PSP加入各式各樣「唔應該」出現嘅功能；上網、模擬器、換壁紙等，個個玩到頻呼過癮。SONY為抗衡呢股DIY改機潮，不斷推出新版Firmware（韌體），希望更新系統可「明哲保身」。
新版Firmware2.0嘅改良算係歷來最「勁」一次！除咗官方正式瀏覽器外，終於加入隨意換壁紙功能，唔似以前咁強制性每個月幫你轉吓色就算，搞到機迷要動手腳先勉強換到壁紙（強行刪除系統檔案，抽出抽入MSDuo），𠵱家簡簡單單就可變換壁紙，淨係呢招已經要你班友仔乖乖投降升級2.0啦！其他主要改良點有新增MSDuo影片左右聲道選擇、支援更多相片格式（TIFF、BMP、PNG）、增強網絡安全等，最遺憾係新加語言只有韓文，中文Encode重未見影，即係MP3歌名、中文網頁顯示仍會亂碼。
亂升級易死機
但凡升級Firmware，都需要相當小心，否則只會換嚟系統檔損壞而死機！所以SCE強制用家升級時，除咗需要充滿80%內置電池外，重要插埋火牛，乾濕電配搭齊晒先畀你升級，一啲都唔馬虎得！升級方法唔算複雜，最簡單一個方法係下載Firmware2.0檔案，再抄至MSDuo內，資料夾建立順次為「PSP」＞「GAME」＞「UPDATE」，之後從PSP之SaveData內揀選便可。
不得不提醒讀者，日本官方網站已發出聲明，話明今次更新檔，只為日本及韓國型號PSP而設（型號PSP-1000及1000K），香港及台灣行機不適宜更新，否則後果自負。網上就有人唔信邪將部PSP-1006由V1.52升級V2.0，導致玩唔番啲Game！不過網上又有人話行機升級冇問題喎。是耶非耶，行機都係等代理SCEH提供下載先升級喇！
下載網址：www.playstation.jp/psp/update/ud_03.html
