迪士尼開幕日子愈近，相關嘅物業成交愈多，好似青衣灝景灣（圖）一個外籍租客，都話睇好迪士尼效應，區內樓價不斷上升，即使銀行再度加息機會大，也堅持唔再租樓住，轉做業主。利嘉閣灝景灣分行經理趙敏健話，個外籍租客以四百八十五萬，買入五座低層H室，一○六八呎，呎價四千五百幾，略低於市價，至於原業主就勁賺一百八十六萬，喺○三年沙士期間以二百九十九萬買入，兩年升值六十二個巴仙。