樂壇新人輩出，新面孔不斷湧現，張穎康亦是其中之一。張穎康讀書時曾走堂和打架，幸得老師指引和支持，及後更獲劉德華賞識，簽他為旗下藝人。有如此雄厚的靠山，康仔深感別人給予機會的重要，故現在他常返母校教學弟彈結他，而他亦承諾會努力工作，報答華仔的支持。
張穎康曾演出電影《給他們一個機會》，該片講述一班被別人視作頑劣、但愛跳舞的年輕人，怎樣「跳出我天地」。張穎康讀書時亦很頑皮，曾經打架和走堂，幸而得到老師循循善誘的教導，知道康仔喜歡演戲和唱歌，更引薦他給電影圈中人，及後認識了劉德華，還被睇中簽約為旗下藝人。
老闆緊張
談到華仔的幫助，康仔日前一臉正經地說：「老闆（華仔）真係好好人，佢畀機會我做戲，之後知我想唱歌，又畀我去試。平時佢好忙，但佢一有時間就會去聽我錄嘅歌，提點有乜嘢要注意。最感動係第一次上台唱自己歌，真係好緊張，但老闆不斷同我講嘢令我輕鬆，之後重為我揀咗條頸鏈，叫我上台戴。佢真係好細心，連呢樣嘢都照顧到，後尾重發現佢喺後台睇住我唱。」
激奀老師
在娛樂圈中遇到伯樂華仔，求學時走堂和打架，又有良師不辭勞苦教導他，令康仔感到飲水思源的重要，故此他雖於扶幼會許仲繩紀念中學畢業多年，但仍堅持有空便回母校，教學弟彈結他。
康仔說：「我成日都返學校玩，重同啲師弟夾band，師弟同我以前一樣咁貪玩百厭，我試過激到個老師上上吓堂撼頭埋黑板。有時師弟冇耐性，但其實佢哋唔壞，佢哋知我係師兄，都好聽話，就算我鬧佢，都會聽。」
採訪：王連連 攝影：何國豪
髮型：Elanie@headquarters 服裝：Lonsdale
