佘詩曼近日情迷價值約二百八十萬元的法拉利F430F1「黑珍珠」戰車，品味與已坐擁愛車的黎明相同，但因「黑珍珠」配額少兼熱賣中，如今落訂也要等到後年才到手，令阿佘望車興歎。
佘詩曼向來對跑車情有獨鍾，近日她對新推出的F430F1「黑珍珠」法拉利跑車極度心儀，並視之為dreamcar，品味與早前已購愛車的黎明相同。日前阿佘在大坑試坐一輛價值約二百八十萬元的紅色F430法拉利時，雖然香車美人互相輝映，但她透露已打消了買車的念頭。
大讚如藝術品
阿佘表示早前出席法拉利名車派對時，即對F430一見傾心，她說：「我鍾意黑色嘅F430，我第一次見到呢架車，已經有衝動即刻買，嘩！藝術品呀！」
雖然法拉利F430價值不菲，但阿佘仍甘願一擲千金購入心頭愛，她笑道：「我都捨得㗎，我冇乜特別嘢想買，shopping、食嘢都唔係，樓又唔係好鍾意，車就好鍾意啦，可能我成日番工，對住架車重多過對住間屋。」
阿佘續說：「我有問過車廠，但話最快要到○七年尾至有，太耐啦，等幾年，冇咗衝動啦，一係就畀五十萬訂，有人唔要就即刻畀我，但又唔知等到幾時喎，架車係靚，重係我嘅dreamcar㖭，可惜要等吖，唔緊要啦，永遠都有新車出嘅。」
享受飛馳感覺
外形嬌滴滴的阿佘打從九九年擁有人生第一輛車開始，座駕清一色是單門跑車，的確令人始料不及，她笑說：「我個樣同性格完全相反，媽咪話我個樣同性格係生錯咗，我細個從來唔玩公仔，玩嘅係遙控車、機械人同lego。我鍾意揸車嘅速度感，好似識飛咁嘅感覺，但一定要一個人喎，聽自己鍾意嘅歌，睇住所有嘢喺身邊擦過，好享受嗰種飛馳嘅感覺。」
採訪：朱倬誼
攝影：陳慧安
粉紅上衣提供：SistyrMoon
