大市反覆，恒指埋單微跌6點，好淡雙方算係打和。中海油（883）跌20仙，拖低恒指26點。中海油話放棄收購優尼科，前日因為呢個消息曾升至5.80元（大前日最低5.30元），昨日消息確認，則跌番落5.35元，一兩日之間上落1成，重厲害過唔少二三線股。
炒中海油C輪，贏錢可能靠運氣多過夠眼光。大行出口術，一陣呢個睇好，一陣嗰個睇淡，有時股價跟佢哋睇法上落，有時又唔跟。賭中海油C輪，賭到精神緊張，唔賭好過。
中電信C輪4500：中移動（941）做大市嘅定海神針，前日跌15仙，昨日升番15仙，收32.10元，再平01年8月以來新高。中電信（728）成日都好定，最高3元，最低2.95元，平收2.975元。有中移動帶住，中電信睇上，C輪諗得過，4500跌10%，收26仙，啱買。
4500今年10月尾夠鐘，溢價2.2%，槓桿率11.4倍（有效8.9倍），引伸波幅22%。
上石化C輪9102：上石化（338）跌2.5仙，收2.90元。熱門C輪9102對正股少少變化，反應好快，收36仙，跌8%。吼低位，買隻輪。隻輪明年6月底到期，溢價9%，槓桿率8.1倍（有效4.6倍），引伸波幅35%。壽命長，溢價貴啲唔係問題。
章盛