楊千嬅和林一峰在前晚舉行的「拉濶音樂會」上，和林一峰合唱改了歌詞的《男孩像你》，當千嬅唱到其中一句「男孩像你只愛同類嗎」時，用手指着林一峰，台下觀眾即拍爛手掌，似對其性取向有所暗示。
前晚在會展舉行「拉濶音樂會─楊千嬅×林一峰」，前往捧場的包括千嬅父母、許懷欣和關智斌等，側田擔任表演嘉賓，千嬅以新款旗袍襯牛仔褲出場唱《啼笑姻緣》，林一峰吹笛伴奏，之後兩人便合唱。
「唔知乜係基」
千嬅在台上硬sell自己主演的電影《千杯不醉》，當唱至主題曲《我的最愛》時，現場大銀幕播放她在電影中與吳彥祖的咀戲和床戲片段，fans起哄大讚，千嬅說：「你哋話好睇，我真係有啲安慰。」
與林一峰在台上對話時，千嬅說：「我以前諗住二十四歲結婚、二十六歲生仔、三十歲退休唔使做，但只係自己以為。」
林一峰就自稱「細個淨係知道乜嘢係不羈，唔知乜係基」，其後兩人合唱林一峰重新填詞、薛凱琪原唱的《男孩像你》，當千嬅唱到「男孩像你只愛同類嗎」時，用手指着林一峰，觀眾即時拍爛手掌，千嬅似對其性取向有所指。
事後千嬅接受訪問時，被問到間接揭露林一峰性取向一事時說：「我哋大家夾咗，因為唔想講咁多嘢，所以做身體語言。」林一峰則說：「冇特別意義㗎，最有意義嘅係我同千嬅好似兄弟咁，大家肝膽相照，難得咁嘅機會，就盡地一煲玩盡佢，大家覺得好睇就得啦。」
叫鄭中基大佬
對林一峰作了一首新歌《給最開心的人》給她，千嬅說：「我第一次聽呢首歌喺飛機度，啱啱嗰陣我爺爺過身，我喊到好似豬頭咁，真係好感動。」前男友鄭中基曾表示想和千嬅上契，她對此說：「咁咪好咯，我買嚿玉畀佢辟邪，上面一於寫個『勇』字，堅嘢嚟㗎。不過我就唔會叫佢哥哥咁娘，係
都叫大佬啦。」
採訪：駱華齡
攝影：林德雄
