「計得精彩」馬主胡世榮突然逝世，今日中午十二時就喺香港殯儀館出殯；因事出突然，好多馬主胡嘅生前友好聽到，都為之打個突，問一句：點解去得咁快？馬主胡係香江獅子會創會會員，呢個會馬主特多，如一哥許淇安（大文豪）、創會會長黃偉慶（成功駒、成功皇）、現任會長何志豪（糖果精英）、會友杜達輝（千禧之光）等等，連練馬師呂健威都係會友，各人可謂志同道合，開午餐會時，傾完正經事（捐錢做善事及慈善籌款），就係傾跑馬，甚為投契。
今馬主胡去矣，遺下妻子及兩名年過二十歲嘅兒子、會計師事務所及其他公司，希望能順利過渡。除咗家人哀痛之外，中大新亞書院表示極大深切遺憾。馬主胡係新亞校友，事業有成之後，不忘回饋母校，每年捐款二十萬元做獎學金，扶助後進師弟妹。聽聞香江獅子會為咗紀念馬主胡，會籌款成立一個胡世榮紀念獎學金，交新亞書院運用。馬主胡生前同左丁山講過，話母校畢業嘅校友，有能力嘅話，應該人人每年捐錢畀母校，多多益善，少少無拘，總之視乎個人嘅收支預算而定，佢話昔年自己讀書得人幫助，方有今日，到咗自己行有餘力，點解唔捐款幫番下一代學生呢。佢講得好有道理，某年一位清貧學生（來自攞綜援家庭）寫信畀左丁山致謝獎學金，左丁山回信畀佢話：唔使多謝，請你畢業二十年後（早啲重好）同樣捐款畀母校，幫助番另一位清貧學生就得嘞！
馬主胡之言，知易行難，不少人發達之後，花錢玩女明星就得，捐錢做善事、獎學金就死都唔肯。大富豪之中，捐錢最爽手嘅，相信就係李嘉誠、霍英東與邵逸夫；億億聲咁捐，長捐長有。世界首富與次富蓋茨、畢菲特話明死後會將家財盡捐，呢啲胸襟，世界罕有。呀，好似重有一位英國超市大王LordSainsbury，話過要在死前捐晒家產㖭。