個市大漲小回，恒指微跌18點，1隻滙控（005）跌70仙，已經拉低恒指25點，其他32隻成份股夾埋，其實仍略有進帳。大市急升後，調整或整固吓好應該，吼低位，細細注買C輪。吼高位買P輪，係非常高手嘅遊戲。
滙控C輪9027：4906係滙控熱門C輪之一，明年1月下旬夠鐘，輪價55仙，溢價3.7%，槓桿率23.2倍。睇吓另1隻9027，明年5月中到期，輪價54仙，溢價2.7%，槓桿率23.7倍（有效12.3倍），引伸波幅12.5%。所有數據，都靚過4906，滙控睇好，揀C輪買，睇數據，9027價筍，交投則冇4906咁旺。
滙控C輪9026：滙控C輪9026，明年4月中夠鐘，輪價59仙，溢價2.3%，槓桿率21.7倍（有效12.4倍），引伸波幅12.2%。呢隻數據比4906靚，但冇9027咁好，交投則熱鬧，唔輸蝕過4906太多。諗住短炒，揀9026好過4906，諗住坐盤坐耐啲，唔係炒出炒入，9027係正路之選，畀3%以下溢價，揸幾個月，發大財都未定。
章盛