《阿嫂》今日上映，戲中劉心悠這新紮阿嫂，俾林嘉欣這領導群雄的真正阿嫂勁恰，無嚟霸氣！現實中的劉心悠呢？一樣純過蒸餾水，無霸氣唔講打講殺，連黑社會術語都唔識多個，畀佢揸Fit社團肯定玩完。總之一句講晒，呢位新紮阿嫂唔合格！
記者：黃藹瑩
攝影：梁細權
特別鳴謝：美都餐室（油麻地廟街36號）
故事講乜
18年前全港最大社團話事人百德（曾志偉飾）的手下阿九（廖啟智飾）殺死兄弟，遺孀洛華（林嘉欣飾）替夫報仇，阿九臨終前把女兒菲比（劉心悠飾）交託百德，菲比長大後百德遭暗殺身亡，社團群龍無首被推舉為新阿嫂，洛華遂先下手為強派殺手追殺菲比。然菲比品性善良，為阻止社團兄弟大風（黃秋生飾）與辰哥（任達華飾）自相殘殺，飛身擋車都制，與洛華狠毒作風大相逕庭！但勢估唔到現實的她同樣單純，斷估拍咗《阿嫂》幾個月，一兩個黑社會術語都識啩？點知……
演技OK
今次劉心悠一人分析兩角，演出記者精心設計的講數連環圖，拍照前記者問：「睇過《古惑仔》、《火武耀揚》呢類黑社會漫畫未呀？」她搖頭；再畀事先準備好的StoryBoard佢睇，她依舊搖頭，睇表情好明顯唔多明內容講咩，不過換衫補妝樣樣無托手踭，重一路拍照一路笑，對住鏡頭重即時入戲鬼死咁惡㖭，演技都有番咁上下。
阿嫂上枱記
估術語8中1
1.上枱=講數 心悠估：「來這裏。」
你都幾有禮貌喎，點解唔估企上枱呢？奇怪喎。
2.格屎=社團 心悠估：「佔便宜。」
喂！差十萬八千里遠喎！劉心悠你點解咁諗㗎？
3.吹雞=召集兄弟 心悠估：「打你。」
未咁快就打，都未齊人，Call齊班兄弟先開戰喇。
4.一平馬=100人 心悠估：「很多兄弟。」
好明顯照字面推理，叻㗎嘞，雖不中亦不遠。
5.花朵=江湖諢號 心悠估：「大佬！」
錯晒！應該是江湖諢號，呢個術語無理由唔識㗎？
6.老毛=利是 心悠估：「毛先生。」
勁爆笑，有老陳唔代表有老毛喎，想像力一流。
7.響朵=說自己江湖諢號 心悠估：「大聲說話。」
算做中一半喇，不過大聲講咩嘢先得㗎？
8.幾両友=幾多馬仔
心悠估：「幾個兄弟。」
全中！斷估呢個最難估，劉心悠反而估中。
Check人氣
精品逐件睇
戲，是否好戲，今晚睇過至知；精品，是否精美，𠵱家有辦你睇。到全線戲院購買預售或即場《阿嫂》戲票1張，即送計算機、日記簿、Cap帽或Tee，送完即止。
