方力申、梁慧嘉（Viann）同女生宿舍成員陳美詩（Macy）噚日喺銅鑼灣拍攝由林子聰首次執導嘅電影《得閒飲茶》，男主角方力申今次扮演俾女朋友食住嘅男仔。方力申話現實中嘅佢唔會係廿四孝男友，始終都要有番啲男性自尊喎！
方力申好肉緊咁話：「我有好多朋友都俾佢哋女友食住，個女仔要吐香口膠，佢哋要即刻用手去接；每次見面，個女仔好習慣要男仔拎手袋，我唔會咁做！」馮仁昭問佢必要時，會唔會幫女友買衞生用品，方力申好尷尬咁話：「可能會陪佢去！如果老婆就冇得講，助人為快樂之本嘛！」
肥仔聰好豔福
拍攝中途食飯時，大家都各顧各，Macy坐埋一邊食，方力申把握時間做StarTV訪問，唯獨導演肥仔聰最好彩，事關靚女Viann坐喺隔籬同佢一齊食，不過肥仔聰見記者猛影相都唔知乜嘢事，佢坐喺隔籬梗係乜都唔知，皆因Viann着住件低胸衫俯低身食飯之餘，心口開胸位置重見埋bra㖭呀！
