本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如果僱主或僱員有任何疑問，可致電勞工處熱線查詢，電話：27171771，由「1823政府熱線」職員接聽。
主任：阿強，點解你個樣愁眉苦臉嘅？
阿強：老細啱啱叫咗我入佢房，話有事同我商量。
主任：吓！佢唔係炒你呀？
阿強：唔係。老細話我已做滿十二個月，應該安排年假畀我，佢重問我下個月一連放七日好唔好。
主任：咁你重愁乜嘢？
阿強：我擔心放年假期間淨係得底薪，無晒勤工獎同埋膳食津貼。你知啦，收入差好遠㗎。
主任：原來係咁，見你出嚟做嘢無幾耐教精你啦。《僱傭條例》講明年假薪酬應該相等於僱員在該段假期內工作所賺取的工資。而工資就包括僱主以金錢形式畀僱員嘅所有報酬、收入、津貼、小費及服務費等，除非係賞贈性質或由僱主酌情發放就例外。所以我哋個個月都有嘅勤工獎同津貼，都是工資嘅一部份，老細會計番落年假薪酬畀你。
阿強：真嘅？其他假期錢係咪一樣咁計？
主任：係呀，呢個工資嘅計法亦應該用來計算法定假日薪酬等等，而且唔單止咁，《僱傭條例》內其他補償項目例如代通知金、遣散費、長期服務金，都一樣適用。
阿強：好彩有你教路，今日下午茶我請客！
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]