中海油（883）終於放棄收購優尼科，認真皆大歡喜，大家都唔使愁中海油出天價收購而導致股東利益受損，況且身邊好多朋友都睇唔過眼美國佬對華的歧視政策，何必重要出高價收購咁益佢哋呢，中海油噚日一度急升5.4%至5.80元，獨力將恒指抽高至升破15200大關。
其後受到中石油（857）急挫拖累，中海油升幅收窄，收報5.55元，升0.9%，大市亦因滙控（005）回軟而跌18點，收報15118，成交達285億元。噚日中石油大跌4.7%至7元，黑客話主要因為中石油近期升得急，令市場憂慮中石油配股或股神畢菲特減持，況且油價升至62美元後，據聞唔少對沖基金開始部署平倉獲利，油價勢必出現波動，除非在伊朗核問題上出現亂子，否則油價好難搵藉口再炒上。
輪到原材料股發威
國企指數雖跌1%至5323，不過個別原材料股升幅不俗，其中鞍鋼（347）勁升5.4%至4.375元，據聞同時有發行A股的鞍鋼亦籌備股權分置議案，即是鞍鋼非流通股股東會提出利誘方案益A股股東，以換取佢哋同意非流通股可以上市流通，利誘方案不外乎送股派現金，但照計H股股東冇份，唔知H股的急漲是否一個美麗的誤會呢？不過據過往經驗，凡宣布股權分置計劃的公司，其A股往往升停板，唔通市場憧憬H股一定會跟住A股升？另外，馬鋼（323）噚日升6.6%至2.80元。
坐咗一排冷板凳嘅奧瑪仕（959）噚日呈異動，大升27.5%至0.37元，成交達8197萬元。此股由去年12月時的4元水平跌至周二的0.27元，累計跌逾9成，現在呈低位反彈亦屬正常。
阿虎