雜誌爆緋聞大動肝火<br>志偉讚嘉欣演技大姐大

雜誌爆緋聞大動肝火
志偉讚嘉欣演技大姐大

曾志偉前晚出席《阿嫂》首映禮,他指嘉欣演技已去到影壇大姐大水平,對於有雜誌指楊嘉雯是他新女,志偉勞氣地說:「咁賤格嘅報道都寫得出!」

電影《阿嫂》前晚在銅鑼灣UA時代廣場戲院舉行慈善首映禮,捐出十萬元給淺水灣獅子會,出席者包括林嘉欣、劉心悠、曾志偉、方中信、元華、謝君豪、羅仲謙,以及監製鄭丹瑞和導演黃精甫。

否認送車

有周刊日前報道性感女星楊嘉雯是曾志偉新女,對於此事,曾志偉前晚勞氣地說:「黐線,講嚟都嘥氣,楊嘉雯之前係Stareast藝人,佢早排打畀我話冇嘢做,咁啱《獎門人》最後一集,我叫埋佢一齊玩,啲雜誌成日叫啲女星扮偷拍影封面,真係賤格到無倫,啲女星連內文同封面寫乜都唔知。」
該雜誌又指曾志偉送車給葉蘊儀,志偉說:「架車係曾寶儀(志偉女兒)返香港間中揸嘅,𠵱家冇用咪賣咗畀葉蘊儀咯,咁賤格嘅報道都寫得出,一睇就知本雜誌係邊個老闆啦!」
志偉前晚大評《阿嫂》的兩位女主角林嘉欣和劉心悠的演技,他說:「林嘉欣係影壇大姐大,做唔同嘅角色演出都好定,而劉心悠就要學好演戲,呢個係新人必經嘅階段,佢運氣好,第一部戲就有老闆咁大投資。」

早餐情緣

問志偉認為劉心悠能否成為張栢芝的接班人,他說:「好難講,一兩部戲未睇到,栢芝係天生食呢行飯,劉心悠要加倍努力。」而劉心悠就表示因第一次出席首映,之前一晚緊張到失眠。
此外,林嘉欣日前接受商台錄音訪問,她表示和父親關係一向密切,父親更不時擔任她的愛情顧問。
而嘉欣亦透露和男友陳光榮緣起於一段早餐情緣,她說:「因為一個人食早餐對我嚟講係好私人,有次佢問我可唔可以一齊食早餐,當時我諗一諗,個感覺就好似要求入我屋企一樣,最後我都答應,佢重即刻飛車過嚟,𠵱家我哋盡量都會一齊食早餐。」
採訪:張俊銘
攝影:陳慧安、林德雄

劉心悠(左)和林嘉欣悉心打扮出席電影首映禮,並擺出電影海報的甫士。

前晚一班《阿嫂》演員出席慈善首映,更為淺水灣獅子會籌得十萬元善款。

為《阿嫂》獻唱主題曲的陳思慧,拖着兩位小朋友上台。