經濟日報（423）噚日掛牌，個七招股，收兩個三，接近全日高位，比招股價足足高咗三成半；記得八方寫過，佢哋高層中，麥華章有1460萬股，陳早標有1160萬股，石鏡泉1100萬股，史秀美900萬股，全部晉身千萬富翁行列；另外一百位次高層可獲大股東慨贈紅股三百六十萬，一樣咁開心啦；至於一般員工，則有優先認股權，唔使抽籤，真係恭喜晒。
喺掛牌儀式，該公司要送紀念品畀港交所，冇嘢直接得過「贈閱」該報，但稱得上紀念品，當然要有紀念價值，所以送上一份創刊號報紙。
噚晚，經濟日報一眾高層去咗慶功，大家食番餐，做報紙做到上市，做到咁發，真係要慶祝。
傳真︰2623-9278
電郵︰[email protected]