大藍籌升到咁上下，紅籌國企又升埋，噚日晏晝濠賭股失驚無神發威，奧瑪仕（959）急升27.5%，收0.37元，朱太隻黃金集團（1031）亦抽上10%，收2.475元，至於龍頭股新濠（200）同嘉華建材（027），都升6%，好耐都試過咁熱鬧。
經紀陳話，雖然唔排除濠賭股突然炒上，係因為大市升到咁上下，游資轉搵細價股炒，不過據講美國金沙業績相當見得人，對濠賭股亦係有利，若純以炒作論，應該唔止炒1日，但要記住隨時準備要跳車。
除咗濠賭股外，久違嘅首長系股份亦見異動，其中旗艦首長國際（697）昨日急升9%，收0.72元，接近1年高位，成交股數1.39億股，金額9701.7萬元。
經紀黃話，單睇首長國際成交量就知唔係乾炒，佢話此系股票早兩年已經完成重組，家陣首長國際專注做中厚板鋼材業務，亦話打算投資鐵礦砂業務，近年呢系股份透明度高咗，多咗同證券界人士見面，所以近日市場炒鋼鐵股之時，向來受到忽略的首長國際亦一併受追捧。
慕容小初