出道三年的鄭希怡曾多次被外界批評歌藝欠佳，她坦然承認自己缺乏一把動人聲線、說話多懶音、唱歌欠技巧、表演又易失準，故她更要強迫自己不斷重看最不堪的表演來刺激自己發奮，並誓言不再咪嘴來自欺欺人。
已有九個月未曾推出唱片的鄭希怡（Yumiko）近期終有新碟出爐，她自知現今市道差、新人多、競爭大，所以更須提升歌唱水準，幸而Yumiko能坦誠面對自己的弊病，不會揚長避短，而且還要爭氣，努力搣甩咪嘴的陋習。
「聲唔好聽歌唔吸引」
日前Yumiko在中環接受訪問時便說：「今次出碟我都好緊張，上網睇到好多評語，有啲話覺得我把聲唔好聽，我都知自己把聲未必唱歌好吸引，技巧唔夠，希望大家放低啲有色眼鏡，畀啲空間我，我對自己要求多咗好多，壓力亦大咗，出道三年，唔可以再攞以前啲標準去衡量自己，錄呢張碟時，我將全部心機擺晒落去。」
對於種種批評，Yumiko說：「批評嘅聲音係要聽，我live表演比以前好咗，因為有練氣，我睇番自己以前一啲live表演，係唔好嘅至攞出嚟睇，迫自己睇咗幾十次，要畀自己知道唱得有幾唔好聽，唔好再畀自己再有呢啲事發生。」
學好廣東話戒懶音
Yumiko又說：「咪嘴梗係唔好，太多人針對呢樣嘢，其實咪嘴好易睇到，咪嘴係呃人呃自己，𠵱家除咗場地唔許可或者一啲特別因素之外，我一定會唱現場，失準被人批評要接受，要被人話吓嘅。」
Yumiko繼續自踩道：「我有首新歌叫《懶音詩人》，歌名係我改嘅，係講自己講嘢多懶音，自嘲吓，呢個問題都要面對嘅。我𠵱家跟緊老師學講廣東話，因為我由細到大講嘢有好多懶音，以前自己用喉嚨唱歌，𠵱家都一樣有跟老師學唱歌，學唞氣、用丹田，又會喺屋企踩單車，重諗住朝早去跑步㖭。」
採訪：朱倬誼
攝影：陳慧安
服裝提供：SistyrMoon
場地提供：Baci
