滙豐恒生宣布業績後，大市受刺激上升，滙豐升得好靚，恒生都唔錯。但恒生一位職員將一份內部通訊畀記者睇，話柯清輝新人事新作風，將滙豐方法帶入恒生，由九月一號開始，做滿五年嘅恒生員工，借按揭買樓，利率改為Ｐ減4.5（目前Ｐ係六厘半，減4.5，即係２厘），與一向沿用嘅定息２厘，冇變動喎，職員似乎不受影響。但諗深一層，以往固定２厘，以後要睇Ｐ嘅變化，假如再加息兩次，每次加四分一厘，Ｐ就會升到七厘，減四點五厘就等於二點五厘，即係話，恒生職員借按揭買樓，都好似客戶一樣，難逃加息之苦，但係對銀行嚟講，以後再加息嘅話，銀行對職員嘅津貼就會降低。舉一個八十年代利率嘅例子，假如Ｐ係十四厘半，減四厘半等於十厘，銀行津貼利息頂多係四厘半，但若果傳統不變，定息於兩厘，銀行對職員嘅津貼就係十二厘半，差好遠、好遠！
柯大班咁識計數，將恒生嘅職員按揭利率改成向滙豐看齊，係為股東着想。聽啲職員講，以往鄭大班好慳家，慳得就慳，所以恒生嘅成本收入比率，全港最低。柯大班上台後，話應使則使，應慳就慳，使一蚊賺兩蚊嘅話，唔怕使多啲喎，如果有人諗到一啲好好嘅使錢方法，不妨話畀柯大班聽。
當今銀行競爭激烈，企業唔多借錢，貿易融資嘅黃金時代已過，按揭貸款嘅息差低得可憐，以往係Ｐ加，𠵱家係Ｐ減，你話差幾遠呢。柯大班上台接管恒生，正是珠玉在前，鄭大班任內，將股價翻一番，固然威到極，但接佢手就辛苦咯，要將恒生股價再翻一番，去到二百一十蚊一股，而維持息率不變，真係諗吓都覺得幾艱難。
富翁Ｈ就一於唔理邊個做大班，佢話過往買入滙豐、恒生等收息，係致富方程式，套用一句英文俗語Ifitain'tbroke,don'tfixit，以後仍然照辦煮碗，直至到滙豐、恒生維持唔到目前嘅派息為止。