唔少租客都鍾意租住新樓,貪夠新淨。好似裕泰興西半山居賢坊嘅單幢樓翠麗軒(圖),早排委託中原地產做獨家代售行,當時已經話呢個盤嘅租務市場唔錯。噚日,中原余慕賢話,頂層一個複式單位,一千零八十六呎,內置樓梯上天台,有客人以每月三萬四千五百租住,呎租三十一個八。 單位業主今年三月斥資九百一十三萬八買入,計落租金回報率有四厘半,都算唔錯。 聽講,翠麗軒呢個複式單位業主,𠵱家重打算將個單位放盤,叫價九百八十八萬,若果以呢個價錢賣出,半年都唔使,賺成七十四萬二。