黃宗澤在新劇《我的野蠻奶奶》飾演汪明荃的孝順仔，現實中他同樣痛錫母親。日前黃宗澤便陪母親到花墟買花粉飾家居，黃媽媽又表示品嘗乖仔煮的美食甜在心頭。
黃宗澤在無綫新劇《我的野蠻奶奶》中飾演既是乖乖仔又是好老公的甯家獨生子甯茂春，在現實生活中，黃宗澤都是孝順仔，閒時喜歡跟媽媽飲茶、買花，再直落唱K。
黃宗澤日前跟母親到旺角花墟買花，平日拍劇日忙夜忙的他說：「其實平時唔使開工，我會陪媽咪食飯、飲茶、買花、唱K，買花係因為我哋鍾意布置屋企，今次係要布置露台，佢就鍾意買花，我就負責買盆栽，呢次收穫豐富，買到四盆植物，重有一盆叫長壽花，幾有意思。」
《我》劇角色甯茂春出名孝順，對住野蠻母親汪明荃總是言聽計從，母親話一，他絕對不敢話二，但是現實生活中的黃宗澤就不是如此聽話，黃媽媽說：「我個仔成日話我唔食嘢，一齊食飯，佢就話我食唔夠，成日迫我食嘢，佢真係好孝順。有年母親節佢親自下廚煮一餐畀我食，真係好開心。」
迫阿媽食好嘢
黃宗澤被問到經常迫其母食飯時，他說：「佢次次都係咁，我同佢都鍾意食魚，一齊食魚佢就揀頭頭尾尾，剩番啖啖肉畀我食，我都話佢好多次，所以咪第一時間挾畀佢，不停咁叫佢食啲，唔係迫佢食，咁誇張！」
採訪：楊潔雯
攝影：陳偉權
