港股終於衝上15200大關，呢個小升浪，由7月8日的13921起步，到噚日高位15201，共上升1280點，升幅9.2%，個別大藍籌同國企，升幅更有20%到30%，相關的C輪，升幅更係以倍計，好友呢個浪賺到笑。
正如早前講過，呢兩三個月來，唔係話冇人相信個市會大升，而係好多人唔相信個市會升，重有唔少人一路睇淡，家吓恒指已昂然升破15000大關，勝負已分，大市預期將開始一次真正的調整，但係會轉向個別發展之局。喺呢個浪，升得急嘅，調整壓力會幾大，未升過嘅，有好大機會接力而上，好似噚日，大市雖回氣，資金一轉身，又去咗賭股身上，再起風雲。
今個賭浪，基本上係由黃金集團（1031）帶起，連續大升兩日，由2元升到2.50元，若果計7月11日嘅低位1.59元，短短二十多日，升幅已57%，消息話注入賭廳已準備就緒，而近期集團屬下兩間酒店的賭場收益亦大幅上升。
現價折讓58%
反彈最勁嘅賭股係奧瑪仕（959），尾市時資金一到位，股價就連跳帶升，短短幾分鐘內，由0.30元搶到上0.37元收市，大升8仙，升幅27.5%，成交話咁快就大增到2.55億股，其他如嘉華建材（027）同新濠（200）等，都有6%進帳。
遠東發展（035）有澳門賭業概念，噚日收3.45元，升5仙，連續兩日升市嘅成交已回升，睇勢已處於突破邊緣。近4個月來，遠展走勢已形成大型複式頭肩底，呢個係典型嘅收集形態，一升破3.50元的頸線阻力，短期上升目標就指向4元。
遠展兩項核心業務，內地地產發展同本港酒店經營，前者進入收成期，後者因迪士尼下月開幕而會愈來愈好景，至於澳門酒店項目，家吓正大興土木，過多兩年就有貢獻，初步估計，每年嘅收益有成5億元。
05年度（3月年結），遠展獲利4億元，升1.7倍，每股盈利32仙。摩根大通最新的研究報告大力推介，預測遠展06年度盈利6.5億元，增加62%，12個月目標價為5元。摩通指遠展每股資產淨值8.38元，現價大幅折讓58%！
郭兆誠