滙控（005）中期業績，市場收貨。恒指升158點，期指升106點，低水7點。期指升得慢過恒指有道理，滙控與恒生（011）本月除息，總共拖低恒指46點。計埋呢個因素，期指實係高水39點。大市勁，好多C輪意氣風發，有貨喺手嘅坐多幾個站，冇貨喺手嘅忍吓手，等平至上車，或者先揀啲落後股，再向相關C輪埋手。
中電信C輪4500：4隻國內電訊股中，中電信（726）與聯通（762）微跌1格，暫時唞一唞，然後跟埋中移動（941）與網通（906）上去。聯通冇乜C輪可以炒，中電信C輪則有幾隻可揀，最熱門嘅始終係4500，昨日成交金額66球。
4500今年10月尾夠鐘，輪價29.5仙，溢價2.5%，槓桿率10.2倍（有效7.8倍），引伸波幅25.5%。輪價由前日33仙跌到30仙以下，冇咗11%，啱價上車，博上到2月份高位44仙。
恒生C輪3347：恒生盤數冇滙控咁靚，股價只向上移動1格，收107.90元。C輪3747升8%，收33仙。
3747明年1月初到期，溢價3.2%，槓桿率32.7倍（有效15.8倍），引伸波幅13.3%。隻輪成交唔多，轉身難。滙控C輪大把得揀，如果睇好銀行股，揀滙控C輪炒好過，起碼要投降都可以快過打針。
章盛