Fujifilm嘅Prosumer機都好耐冇新機發布，最近日本網上公布新FinePixS9000將會8月尾推出，好多攝影師都上網爭住睇，的確係一部令人好期待嘅勁機！
第一注目點，係佢行全新第5代SuperCCDHR1/1.6吋感光元件！S3Pro行嘅第四代SuperCCDSRII已經畀人一種超精細畫質同極端銳利嘅感覺，今次S9000行新一代SuperCCD，相信會有好大改進！暫知佢未經插值下，相片最高成像有成903萬像素，這可是未有Prosumer玩過的解像度！更強之處係佢由ISO80-1,600，「80」固然係令影像更Fine，更厲害是「1,600」，這可是以往D-SLR級相機獨有，今次用於S9000之上，感覺真係勁抵玩！
手動Zoom重炮
鏡頭亦是一大改進項目，由以往的電子Zoom改為手動Zoom，操控感更自由、精確，亦好有大機Feel；10.7×光學變焦超重炮，焦距由28-300mm（F2.8/W-F4.9/T），真係抵得住好多D-SLR機嘅「一機兩鏡」！不過更興奮嘅係光圈選擇有F2.8-F11（13段），齋以上述功能而論，一般報館、雜誌攝影師，都認為佢可以做搵食機有餘；日本方面估計售價為8萬日圓左右（約港幣$5,500），真係抵玩到令人難以相信！
至於其他功能方面，1.8"顯示使有外翻式設計，就鏡攞位更見方便。機頂設有熱靴，支援外置閃燈；在拍攝效率方面，開機僅需0.8秒，快門延遲時間亦僅為0.01秒，行4粒AA電芯、對應CD及xD卡，相信大家都冇乜投訴！
記者：朱崇德