爆機狂迷：畫面拍住《FF》新立體影像技術靚爆

講到PS2最出名嘅RPG，《FinalFantasy》同《DragonQuest》（勇者鬥惡龍）無疑佔有一個重要位置，今個星期同廠SquareEnix就推出咗另一隻RPG《GRANDIAIII》，已經係同系列嘅第四部作品，可見佢嘅受歡迎程度絕對唔比《FF》遜色，除咗故事精采之外，遊戲嘅畫面真係靚到「揼」一聲，難怪得到一眾RPG迷垂青！

記者：梁瑋瑜

Profile

機種：PlayStation2
類型：RPG
售價：$488
發售日期：8月4日
SonyStyle（23452966）

《GRANDIA》一直都由GameArts製作，首部作品於1997年喺世嘉SS上推出，當年已經有好多玩家認為可以同《FF》一比高下，之後《GRANDIA》再喺世嘉DC同埋PS上面推出續集《GRANDIAII》，同埋PS2上嘅外傳《GRANDIAX》，事隔幾年今年首次由SquareEnix作為發行商，推出第三集，更由《GRANDIA》全系列監製高橋秀信率領原班人馬製作，Fans一定唔會失望。

■見到咁精細嘅畫工，相信大家都為之動心。

■人設面相、服飾都非常仔細。

由追尋飛行王開始

遊戲由「飛行王Schmidt」開始，傳說中佢駕駛着世界上最快同最豪華嘅飛機；雖然關於佢嘅故事，漸漸為人淡忘，但係自小鍾意飛行嘅男主角──16歲少年Yuuki，就為之十分嚮往，睇佢一身《Steamboy》造型，就知道佢真係好熱愛飛行，喺故事裏面，佢為咗去尋找傳說中「飛行王Schmidt」，而製造自己嘅飛機，誓要跨越大海一睹飛行王風采。
而女主角就係識得同聖獸Gurifu溝通嘅「神人」一族16歲少女Alfina，佢嘅哥哥突然下落不明，於是佢就獨自起程，去Arcliff神殿尋找哥哥嘅蹤迹。兩個人都喺和平嘅地方出發，故事發展落去講到世界開始變壞嘅時候，兩人就相遇，而且一齊去為世界嘅存亡而戰鬥。

■Alfina終於搵到哥哥，但係佢好似變咗第二個人咁。

■Danna係占卜師，好多嘢都要佢幫手。

■女主角Alfina嘅設定好精靈Feel。

■男主角Yuuki年紀輕輕，充滿理想。

■Uji係一個半獸人，生性充滿正義感。

特別系統添趣味

一般嘅RPG，都離不開普通故事發展同埋作戰場面等等，《GRANDIAIII》更加改良咗同系列一向採用嘅「UltimateBattleSystem」特別作戰系統，每次出招之後，都會有精采嘅戰鬥畫面睇，增加遊戲嘅電影感，而且重有一個叫「SAS」嘅系統畀玩家配搭同伴之間嘅戰術，令攻擊更加有力量。今集又加入咗一種叫「ManaEgg」嘅物品，分成唔同嘅特性，可以合成唔同魔法，而每一個主角都有唔同嘅絕技可以出，大大咁增加遊戲趣味性，鍾意玩RPG嘅朋友一定唔可以錯過。

■Yuuki使出絕技飛燕斬。

■Yuuki同Alfina聯手對付巨神兵。

■故事一路發展，就會有更多人加入做同伴。

畫面音樂同樣出色

聽完《GRANDIAIII》咁引人入勝嘅古仔，已經令到好多玩家心郁郁，相信大家睇埋遊戲畫面，就更加認為非玩不可！整個遊戲嘅畫面都採用咗最新嘅技術製成立體影像，無論係人物定係背景，都畫得好有立體感，畫面非常出色，睇落比起好多同類RPG有過之而無不及，同《FF》絕對有得揮！
另一樣值得一讚嘅地方，係遊戲裏面嘅音樂十分之好聽，而音效方面亦都相當逼真，尤其是作戰場面嘅音效，令玩家更容易投入遊戲當中，原來遊戲所有音樂係由一向擔任《GRANDIA》系列音樂總監岩垂德行負責，難怪可以保持住出色嘅質素！

■戰鬥畫面嘅爆風，真係做到一份震撼感覺。

■人物同風景都好有立體感。

■畫面咁靚，拍得住《FF》。