大笨象跳舞，為港股注入新動力。恒指重上萬五點大關，收報15137，升158點，日線圖9RSI高至90.55，確實非常超買，但亦反映出大市動力澎湃。
滙控（005）派完成績表後，股價再進1.3元，收報128.50元。滙控呢期業績算唔算好，見仁見智，大行對其後市之睇法亦相當分歧。一波睇得最樂觀，目標價去到155元；高盛話滙控乃亞洲銀行股首選，繼續給予跑贏大市評級，目標價146元；摩通則維持中性評級，目標價由133元提高至138元。
荷銀本來叫沽滙控，睇完業績後唔敢咁淡，但亦只係將評級提升至持有；德銀則把大笨象降級，由買入降至減持；一淡到底嘅係大摩，維持減持評級，目標價120元，理由係滙控下半年仍面對環境挑戰。且看今次有冇人聽大摩支笛，促使大市順勢調整。
倉內的遠展（035）最高曾見3.45元，收報3.40元，升兩格，算是突破下降軌阻力，美中不足的是未能以光頭陽燭高收，或需作旗形整固，仍以10日線（3.30元）止蝕。神華（1088）高見8.70元後回順，收報8.60元，升3格，短期相信要回氣，止賺位推高至8.45元。國壽（2628）平收5.85元，再試5.90元不破或跌穿5.85元沽出。
下降楔形博突破
鞍鋼（347）急升4.4%，收報4.15元，走勢甚佳，20日線將升破50日線，形成第2個黃金交叉，購入母公司資產一事隨時落實，但提防重提供股，4.3元水平阻力不輕，自己執生。
另一隻鋼鐵股馬鋼（323）昨日僅升1%，收報2.625元，相對落後（重鋼（1053）亦升近3%），值得一敲。由去年10月至今，馬鋼走勢形成一巨大下降楔形，降軌阻力目前約在2.725元，一旦突破，短線上望2.95元；若重返楔形起點，中線可見3.55元。
趙飛雲