上星期分析師Ｆ升壇講樓市，八百幾人靜耳細聽；散場之後，觀眾將佢包圍，工作人員急忙護送Ｆ哥入貴賓房，房內已有十幾位地產版記者等住訪問外，行路入房之時，一位身穿名牌啡色格仔衫裙嘅中年女士追住Ｆ哥問：「你同唔同人管錢嘅啫，畀錢你投資……」Ｆ哥急忙搖手：「唔同，唔同，我哋只係做分析……」左丁山聽見，暗呼可惜，睇嚟下次佢再公開演講，不如請埋私人銀行（privatebanking）嘅同事嚟，專門招呼呢類人客，肥水不流別人田吖嘛。不過回心一諗，Ｆ哥間銀行做privatebanking，久唔久就會開辦小型投資講座，左丁山一位朋友去過，佢話出席陣容鼎盛，銀行點會志在公開招客。
記者不斷發問，Ｆ哥飲杯茶行出貴賓房，已經係三十分鐘之後，估唔到房外有一位打扮高尚、態度誠懇嘅阿太，一見Ｆ哥行出房外，立即亦步亦趨，追問美國樓市（Ｆ哥話有泡沫，有爆煲危險），及美國樓市對香港之影響，Ｆ哥一一作答。走到酒店升降機，阿太千多萬謝，向Ｆ哥來一個日本式五六十度鞠躬，Ｆ哥一時之間唔知點樣還禮。
做分析師做到如此受歡迎、尊重，點到你唔服。聲譽係用時間積累番嚟嘅，記得去年Ｆ哥出席類似講座，俾人包圍，一位衣着華貴嘅阿太高呼：「Ｆ哥，我係你嘅fans，你講乜我就買乜，你講啦、講啦！」其他人一齊起哄，Ｆ哥逼於無奈，講咗三個冧巴，就係17、41、83。大家查番四十幾個星期前17、41、83做乜嘢價，呢兩日做乜嘢價，就知道啲阿太點解要追住Ｆ哥。
好嘞，冇人再跟住嘞，左丁山捉咗Ｆ哥去Grappa's飲下午茶。Ｆ哥講講吓，索性在左丁山嘅筆記簿上猛咁寫低一啲利率、通脹、預期回報數字。呢類數字，全部係公開統計資料，不過聽佢嘅詮釋，先至係精華所在。請佢一杯咖啡，抵到爛。