啱啱喺五月上任嘅恒生銀行副董事長兼行政總裁柯清輝柯大俠，日前以戰戰兢兢嘅心情，首次宣布恒生中期業績後，按傳統再喺派成績表翌日見吓傳媒朋友。雖然兩日行程咁緊密，又要見分析員，又要見投資者，重要見鬼死咁煩嘅傳媒，但係柯大俠依然係咁容光煥發。
有記者問柯大俠，係唔係因為調咗嚟恒生得閒咗，所以有時間可以執靚啲呢？柯大俠話梗唔係啦，佢嚟咗恒生重忙過以前喺滙豐嗰陣時，家陣執到咁正，係要多謝恒生嘅公關大員，好緊張咁幫佢扮靚靚咁話。八方估唔到恒生嘅公關連形象顧問都掂喎。
又有記者攞番上個月柯大俠因為內部資料錯誤，因而話該行人民幣存款，一日急升四倍去到五千萬人民幣嗰件事出嚟講；柯大俠冇嬲，笑笑口咁話，啲資料係同事畀佢嘅，所以𠵱家有關數字經已變咗佢哋嘅目標啦！壞事變好事咁話㖭，呢個指標，佢同事恐怕做到氣咳喇。
講完恒生，又點可以漏咗滙豐？話說新的特首想改組行會，滙豐大班鄭海泉會唔會俾煲呔徵召入閣，一2
鄭大班：曾蔭權冇搵我
泉哥直截了當說：「多謝大家抬舉，政府冇搵我」，有人好聰明咁問，曾特首有無搵呢？「曾蔭權都冇搵我，夠坦白喇啩」。
回歸前，滙豐一直有代表喺行會，泉哥本身都做過前行會成員。但佢解釋，行會成員都係以個人名義任命，滙豐一向講企業責任，若果任何同事有能力透過參與公共事務，回饋社會，獲政府邀請擔任公職，集團都會好鼓勵。之不過滙豐作為商業機構，就唔希望參與或評論政治。
正如佢哋銀行對收購問題嘅口頭禪，「neversaysnever」，冇話一定做唔做嘅。滙豐當然想有人喺權力核心，鄭大班亦想做，但英資嘅背景，你估煲呔點諗呢？
爆料熱線：29290000、27860099
報料傳真：26239278
報料電郵：[email protected]