民企呢期認真無運行，繼科龍（921）同埋格林柯爾（8056）位老總被人拉後，噚日又輪到一直被芬佬看好，預期可藉大陸推行3G而受惠的京信通信（2342）發出盈利警告，結果隻股噚日最低被質落2.20元，收2.475元，跌10.8%。
小初睇清楚張圖，發覺京信股價由上個月開始，已經由3.30元一路下跌，有人咁醒目一早沽定貨，莫非又係有春江鴨？其餘民企如日前講過嘅國美電器（493）昨日跌4.6%，收4.625元，至於大成生化（809）都跌2%，收3.625元，原來已經係1年來低位，真係觸目驚心。
另外，久違嘅南海控股（680）與中國數碼信息（250）進行重組，向中國數碼信息股東分派南海股份後，股價開始見異動，南海昨日升13.7%，收3.3仙，成交股數1.64億股，金額520.85萬元。
但經紀陳話，兩間公司的重組行動仍未完成，仍然有待南海購回中國數碼信息控股權，由仔變老竇，有關計劃先至完成，家陣相信只係虛火，仍未係時候炒上。
慕容小初