陳浩民同唐文龍最近喺番禺拍攝無綫劇《人生馬戲團》，點知佢兩個俾狗仔隊影到喺夜店出現，事後雜誌記者訪問嗰位夜總會女公關時，女公關重語帶雙關話陳浩民持久力強㖭！對於夜蒲一事，陳浩民經理人林先生噚日解釋話當日陳浩民只係同同事唱Ｋ消遣，係日常生活嘅一部份，佢話：「唔好屈得就屈！既然話開房，跟佢成晚又影唔到佢上房？佢哋始終係明星，啲女仔話同邊個上過床，咪得啖笑囉！」
曾勵珍先見之明
馮仁昭知道無綫一向重視藝員形象，早排《火舞黃沙》嘅演員返內地拍外景，高層曾勵珍都特別同佢哋訓話，話內地不時有狗仔隊，叫佢哋要檢點啲，今次陳浩民同唐文龍俾狗仔影到就印證佢番說話嘞。
其實唔少男藝人都試過俾狗仔隊踢爆喺內地召妓，馮仁昭認為無論有冇狗仔隊跟蹤都好，身為公眾人物都應該要檢點，行得正企得正嘅話，咪唔使怕俾人講東講西囉！