【本報訊】二十一歲青年涉嫌夥同好友布局在華山村殺父一案，昨在高等法院續審，該青年向警員透露，布局只是要整傷生父，況且中途他曾決定終止行動，沒想過好友未能會意，竟然繼續郁手，更指好友「唔醒扒、唔醒目」。 記者：梁瑞珮
兩名被告為張銳剛及梁偉基，均二十一歲，同被控一項謀殺罪，指他們於去年七月二十二日謀殺五十二歲男子梁志忠。
着一起賣丸仔還債
控方昨在庭上播放被告梁偉基與警員進行的錄影會面，梁在影帶中表示，案發十個月前，與張在明愛中心修讀課程，及後由社署安排到勵行會讀電腦重遇。梁透露，張聲稱因欠債三萬元，着他一起往的士高交友賣「丸仔」還債，惟在案發前一星期父親已從內地返港，父親管教嚴厲不准他出夜街。
兩、三天後，張追問其父何時返鄉，他表示父親有官司，須留港等信件，最快兩、三個月後才返鄉；張指屆時暑假已過，遂提議整傷父親，但遭他推搪。數天後，張建議索性「隊冧」其父，他坦言：「唔得，我阿爸嚟㗎，使唔使為咗啲丸仔搞成咁吖？」
梁又稱，案發翌日要見工，張聲稱遭人追數，遂提議以見工做藉口，誘梁父到偏僻處將他整傷，又謂：「早一日整傷佢，咁早一日落Ｄ場。」他雖應承，但向張講明：「唔好拮佢重要位置，等佢瞓吓醫院就得，真係唔好搞出人命，始終係我阿爸。」
梁續稱，父親陪往華山村途中，他已改變主意，不想傷害父親，於是加快步伐，與父親盡快行離原定落手的雞場位置，行往有民居，有狗及光猛地方。他沒有向張打手語，以為約定地點已改，張應知道終止行動，估不到他仍然出手。梁謂：「我估唔到嗰度咁多人佢都夠膽郁手……以為佢縮沙會走，我唔知佢唔知取消行動，咁唔醒扒、唔醒目！」
「我唔同意殺阿爸」
梁向警方說：「我唔同意殺阿爸㗎，不過整傷佢都唔係乜大問題，係我決定喺邊度落手同提供刀。」
案件編號：HCCC372/04