股東周年大會係上市公司管理層同小股東一年一度嘅碰面機會，但有啲公司有嘢唔想俾人知，就會晨咁早喺冇雷公咁遠搞股東會，博班股東唔去提問。 不過凡事冇絕對，好似東方明珠咁，「大廚坤」黃坤唔玩，由資深地產炒家羅家寶接手，定八月二十五號開股東會，地點喺澳門，東方明珠唔單止唔係想拒小股東於千里之外，反而會熱情款待。 公司公布，本月十二號前，名列股東名冊嘅，出示身份證明文件，可獲澳門船飛及當地晚餐券，等各位股東開完會，賭兩手，食埋晚飯先返港。