咬蘋果：派傳單<br>傳單≠垃圾有金執咪亂掉

咬蘋果：派傳單
傳單≠垃圾有金執咪亂掉

昨日有報道謂半數人會胡亂丟棄免費報，街邊宣傳單張呢？重誇張！上周有報道指高達8成傳單被當垃圾咁掉！掉咗隨時走寶，皆因唔少傳單連埋優惠Coupon，剪低張飛仔幫襯少則平幾蚊，多則慳番兩三百，你都咪話無着數！橫掂派傳單的靚仔靚女主動塞到你手，攤大手板就有金執，攞咗咪睇過無用先掉囉，不過記得掉落廢紙回收箱喎，環保嘛！

記者：招佩珊
攝影：梁細權、楊錦文
模特兒：Yannie、Bianca（Salvador）、Tobey

傳單當錢使

時間，上周日6:30pm；地點，旺角西洋菜街行人專用區，話說模特兒由銀行中心行到兆萬中心，短短不足2分鐘路程已經接到10張傳單，當中7張有Coupon，精美彩色印刷傳單優惠闊綽唔出奇，好似唱K有85折、消夜時段食壽司有7折最多慳$300，但估唔到低成本製作的眼鏡店傳單一樣可以當$20現金使，幾毫子單色影印紙竟然都值$20！

■上周有一項街頭傳單調查報道，原來有8成傳單會被棄掉。

昅埋着數專員

■靚女派傳單，唔接都要昅吓。

■高大威猛日本料理廚師派傳單，好Man喎。

■「嚟Neway，唱好K！」型爆哥哥仔靚仔到選港男都重得。

動粗兼快閃

該項名為「派傳單有無用」的調查，由十多位中學生在7月初分別於旺角、灣仔、上水與荃灣街頭作實地觀察，結果發現每10,000人中只有68人會接傳單。記者派出模特兒到旺角派傳單，好多街坊都唔接，嫌煩嘴藐藐當人透明都算，最睇唔過眼嘅係有人動粗，一手推開模特兒，唔接咪唔接囉，唔使批踭呀？

唔接！

閃避！

開踭！

■做出面，擺明厭惡唔想接。

■突然加速，慌死走唔切。

■見你唔到，見你唔到！

觀塘「聲」戰肥仔vs阿姐

講起派傳單，觀塘都有兩個街知巷聞的派傳單奇人，二人或者係前世宿敵，又咁啱分別替兩間喺正隔籬大廈嘅韓國菜館派傳單，搞到日日互片鬥大嗌蔚為奇觀！現場所見，二人距離唔超過10米，說話窒吓窒吓的肥仔企正馬路口兜截途人，相反，自稱「阿姐」的阿姐企喺行人路靠把聲喪嗌出奇制勝。記者上前搭訕，肥仔咁話：「佢影響唔到我！」阿姐就咁答：「各有各嗌，最緊要啲客識貨，我哋啲食物夠新鮮，你試過就知正。」識得打蛇隨棍上，抵加你人工喇！再問十步以外的報紙檔，檔主李小姐話：「好嘈㗎，不過無計啦，煩死人！」