昨日市場焦點當然以滙控（005）為主，好彩佢嘅中期純利上升9%，好過預期，睇嚟今日無論滙控股價抑或大市，都有機會齊齊上升。
呢排除咗大大隻嘅半新股如中國神華（1088）及交通銀行（3328）等股價顯著回升，非常好炒外，個別細價股亦靜極思動，但據講炒作終極目標，都係不外乎批股集資之類，但批唔批得成就真係好難講，皆因小初認為，家陣尚未係細價股發威之時，就算有細價股炒得上，分分鐘都係乾炒牛河，未必散到貨之餘，亦唔敢講話一定批到股。
其中創業板股中裕燃氣（8070），在公布發行價值1億元的新股，向大股東收購河南省燃氣項目後，昨日復牌，股價以全日最高位的0.415元收市，升咗12.16%，但成交好細，只得469.2萬股，金額188萬元。
雖然燃氣股以前曾一度熱炒，家陣都仍然有新奧燃氣（2688）企硬響6.15元的52周高位，但畢竟中裕係創業板股，而且近年不斷收購業務，故不時又供股又批股搞集資，今次又有咁大投資，再搞集資並唔出奇。
慕容小初