咬蘋果：街頭熱鬧<br>有劇上演街頭試練$0浮誇宣傳

一個單人匹馬，拍膊頭搵朋友大嗌：「呢鑊盡地一煲！」唔掂就繼續做「流四」、拍教育電視、做帶位、扮小丑；另一邊廂都係拍膊頭，但就拍咗好多放暑假嘅大學生膊頭，一星期做五日互動街頭劇，做足工夫搞宣傳，算到盡將「唔掂」嘅機會降到最低。——兩個演藝畢業生，道不同不相為謀，唯一共通點就係要大肆宣傳即將出爐嘅大搞作，落旺角街頭表演，俾人圍、賺人氣！
記者：馬慶武
攝影：陳智良、梁細權、楊錦文

蒲開旺角嘅人一定識佢哋「好戲量」，最搶鏡之作係喺2月14日情人節，整咗壇幾可亂真的「兩王一后」街頭爭女劇，兼且粗糙地拍低全過程在網上廣而傳之，引嚟傳媒報道。

「好戲量」上個月開始喺旺角行人專用區一星期做5晚街頭即興劇，而且重係互動形式。「希望同觀眾多啲溝通，對嚟緊上演嘅話劇有幫助。」好戲量首腦兼藝術總監Benky話明出街Show唔係為宣傳新劇。咁為咩呢？「想多啲人睇到我哋演戲，多啲人認識戲劇。」哦，明白晒！
呢一連串嘅即興劇會一直做到今個月8號，平日夜晚7、8點開Show，星期日就喺下午4、5點。同佢哋即將上演的《我愛你個頭》主題一樣，街頭劇主題都係圍繞愛，同大家齊齊搵番愛嘅源頭咁話。不過街頭即興劇就加埋現場觀眾參與，圍觀嘅觀眾可以寫對白紙仔傳畀演員，演員就將對白重新演繹連貫劇情。咁新鮮嘅玩法，次次出Show都引嚟一棚人圍觀。

■好戲量主腦Benky曾經主理過《驅哥》、《陰質教育》、《或者長毛或者哲古華拉》呢啲舞台劇，經驗極豐富。今次《我愛你個頭》更係大製作，有四、五十人參與！

■每日出發前，男主角阿權都會同呢班義助嘅大學生講解吓今日戲劇流程、時間等，阿權重話包括佢自己在內，全部人都有機會擔當不同崗位，表現自己。

■完場之後會有專人問觀眾意見，重會問佢哋攞埋電話，驚觀眾們錯過佢哋之後嘅演出。嘩，咁樣攞Contact都好有腦！

嗌交開場
■男女主角飾演嗌交情侶，演得好肉緊，真嘅一樣。

點吓唱先～
■中途會有工作人員派紙畀圍觀者寫對白畀番演員講，呢位觀眾就邊寫邊含笑喇！

騎呢對白
■記者好奇執番地下嘅紙仔睇吓，竟然有人寫「×××，我好憎你！」，嘩！使唔使幫你點首歌㖭呀？

我哋夠叠馬！
■睇吓講吓，竟然有觀眾寫咗個新角色出嚟，好彩好戲量五十人夠叠馬，即時應變。

擒梯旁述
■除咗演員外，重會有個擒梯旁述，教吓大家點樣玩互動，搞吓氣氛！

■得意少女都傳紙仔，都睇得幾投入。

■觀眾都好踴躍參與，估唔到連小朋友都識得拍拖鬧交要講咩：「唔好咁幼稚、咁小朋友得唔得？」嘩，老積仔！

■咁多宣傳橫額晒喺地，好彩食環署督察俾佢個大頭引開咗注意力，如果唔係呢度起碼罰番一萬幾千。

我愛你個頭
日期：8月10-14日　地點：香港大會堂劇院
票價：$500、$150、$120、$100
查詢：27349009

「跨代明星無我份，跨代貧窮要我啃！」
「呃到你盡，又咪$99蚊！」（《發牢騷》門票$99）
「落旺角，搵命博！」（指旺角環境複雜）
「藝術源於生活，高於生活，但係維持唔到我嘅生活。」
「我係印象派演員，因為啲人睇完我淨係有啲印象。」

近日《蘋果》編輯部收到一個Email，標題係「我想你嚟訪問我」，夠直接！出到嚟做訪問，亦無令人失望，首先背景夠過癮：阿Sam曾經做過帶位、小丑，拍過教育電視亦拍過三級片。自稱近期最滿意傑作係小二常識科ETV《郊遊安全》嘅阿Sam重話：「問我拍過邊套三級片，《愛在三級的日子》囉！喂，你唔係想摷番出嚟吓嘛？唔好呀！咁以後我重使撈『教育電視』嘅？而且我喺戲內都係演『文戲』，導演話我身材唔好，冇得演『動作場面』！」講到第一次棟篤笑，Sam正經起嚟：「黃子華、詹瑞文佢哋年紀大啲有經驗啲，但我一樣好多經歷！我哋呢一代歎慣食慣玩慣，𠵱家時勢要捱要搏，心態轉變好唔同。所以今次《發牢騷》會以我自己經歷為主，再講啲我覺得荒誕嘅社會現象，好似隱蔽青年咁。」

■肉彈、帶位員、小丑呢啲造型都會喺《發牢騷》出現，因為呢啲行業阿Sam都做過，經歷嚟嘅！

■喺銀龍茶餐廳即場換上蛤乸衣，準備出街頭Show。嘩，阿Sam，表演慾強成咁？

■（左起）負責錄像嘅小強、監製兼導演Paul同舞台監督威威都係拍膊頭免費幫拖，齊齊籌備咗9個月。