世姪Ｗ去年讀完法律系，唔去律師樓實習、考律師牌，竟然學習曾特首，走去做一位孤獨的推銷員。推銷啲乜嘢呢？就係財富管理產品。佢中學讀理科、大學讀法律，考CFP或RFP，難唔倒佢，考到牌就可以做IFA（獨立財務顧問），推銷產品。呢份工冇底薪，一個月做唔到生意，就會周圍岳，冇米落鑊。好彩佢爸爸媽媽只得一粒仔，唔會餓親啫。
幾個月前見佢神情冷漠，滿面緊張之色，一睇就知道佢冇乜行當，你估做推銷員好易咩，捱吓鹹苦先啦。呢日在史丹利街碰到佢，行路彈吓彈吓咁款，套西裝似係名牌Ｂ兄弟噃。世姪Ｗ立即打招呼：「咁好撞到世伯，使唔使同你做個財務策劃，考慮吓退休保障呀？」左丁山費事講咁多，單刀直入：「有冇收入呀，七月有幾錢落袋？」世姪Ｗ笑笑口話：「七月應該有八、九萬啦，六月就有五萬，四、五月食穀種。」咦，當佢上半年收入十四萬，平均每個月兩萬零，唔錯噃，算係好搵。後來打電話畀佢老竇：「乜你位公子咁醒呀，搵八九萬銀一個月？」老友Ｗ話：「佢好辛苦㗎，有幾個月非常冇癮，唔想再捱。你估每個月都有咁多錢咩，不過阿仔做呢份工之後，成熟好多，唔再頂我嘴，肯講sorry與請多多指教，睇嚟做推銷員係好好嘅人生訓練。」
從一位資深IFA得知，呢個行頭慢慢開始為中產階級接受，生意來得唔錯，有唔少會計師、律師、工程師入行，平均每個月賺兩萬（全以佣金計），叫做及格。呢位Ｓ君話：「推銷員第一個條件係考到CFP/RFP，唔使返工，一切自由，做到生意就與公司分佣。如果佢要我在辦公室，提供埋cubicle、電腦，甚至秘書，就唔可以每個月賺兩萬咁少！」呢個行業類似賣保險，世姪Ｗ估計五年後佢嘅收入就會超越阿爸喎。