噚日係解放軍建軍七十八周年，為咗慶祝八一建軍節，駐港部隊下晝就喺中環總部搞番個招待會，重有女兵表演節目助興㖭。出席嘅嘉賓個個有來頭，兩位政協副主席霍英東同董建華梗唔少得，重有新的特首煲呔、兩位司長許仕仁同梁愛詩。
身為主人家嘅駐港部隊司令員王繼堂喺致辭時梗係一味唱好，話會支持特區政府依法施政同埋參加多啲香港社會公益。八方一向認為駐港部隊表現好好，值得一讚，特別係對《蘋果》一視同仁，永冇大細超。
其實，普通市民唔記得八一建軍節唔緊要，因為大把人爭住提醒我哋。八方噚日打開《文匯報》，有幾版致意廣告，致意嘅人包羅萬有，勝利火腿廠、「杏林奇人」馮豪中醫等，不能盡錄。呢啲廣告千篇一律，來來去去都係「熱愛人民」、「保國衞民」，冇厘新意。
唯一有啲心思嘅係來自中國基督教播道會港福堂嘅廣告，內容係咁嘅：「善戰者折人以理，善用兵者動之以情；情理兼備、軍紀嚴明，則國護民衞，干戈化玉帛，天下太平矣。」
港福堂代表話：「我哋落𠵱個廣告唔係擦鞋，你有冇留意個廣告相當另類？解放軍對內部同外部都打過仗，𠵱家台海兩岸咁緊張，我哋落廣告嘅用意係唔鼓勵戰爭。」
爆料熱線：29290000、27860099
報料傳真：26239278
報料電郵：[email protected]