有「機場」之稱嘅先達，最近製造咗唔少SonyEricssonW800i嘅傳聞，好似早兩、三個星期，就有店舖將K750i及D750i「變種」成W800i咁款。查實，過程只不過係好簡單咁裝咗套「Walkman」軟件，再換一個非原廠機殼就咁搞掂，開價唔使$3,000，據講好多玩家重當正佢係W800i咁玩！
跟着上星期亦有部W800c登陸，無論跟機包裝、外形功能都同港版W800i好接近，但係「c」始終係國產貨，顯示簡體中文之餘，開賣價重高達$4,680，當然，咁嘅價位，重要係水貨，似乎只有追機族先玩得起喇！
唔知香港「新愛記」係咪睇見傳聞充斥市場，所以決定喺今個禮拜四盡早推出行版呢？據講，當日重請埋容祖兒做嘉賓，睇嚟W800i嘅勢頭的確唔小。
文：尹謹基