恒指升近百點，最大功臣係滙控（005）。滙控由跌40仙變升80仙，雖然只係扯高恒指29點，但佢帶好大市氣氛。4點正收市後，期指炒多15分鐘，埋單計高水46點，個市對滙控份成績表肯收貨。倫敦滙控初步對盤數反應亦都OK。
滙控C輪9183：是日最旺嘅滙控C輪係3977，總成交936球，金額2.23億元，恒生（011）正股成交金額2.03億元都唔夠佢勁。3977收23.9仙，升幅16%，隻輪明年1月初夠鐘，溢價5.6%，槓桿率54.1倍（有效18.4倍），引伸波幅13.4%。
如果見獵心喜，想炒類似9183大槓桿率而壽命又唔短嘅滙控C輪，可向9183埋手。隻輪昨收23.4仙，只升得6%。明年3月尾到期，溢價8.0%，槓桿率54.4倍（有效15.5倍），引伸波幅13.9%。溢價當然唔平，炒嘅話至緊要快手快腳。
中銀C輪9068：中銀（2388）收15.75元，升1格。滙控業績好過預期，中銀都有運行，吼低收啲C輪，搵餐晏仔。中銀C輪9068可能係同類輪中最佳對象，明年6月尾到期，輪價1.18元，溢價2%，槓桿率13.4倍（有效8.65倍），引伸波幅14.9%。炒中銀短期啲C輪，則揀4760，呢隻買賣好易。
章盛