港九拯溺員工會噚日發起罷工一日，有六百幾個救生員響應，坐晒喺淺水灣沙灘抗議。何志平局長今勻真大鑊，八方都為佢擔心，驚萬一一個唔好彩，有人浸親或者唔舒服，佢分分鐘成為曾班子第一個犧牲品。
救生員罷工，估唔到成為議員拉票嘅平台。出席聲援佢哋嘅有立法會議員大嚿陳偉業同長毛梁國雄、東區區議員阿牛曾健成同南區區議員石國強。
大嚿猛撥火煽動
出名激嘅大嚿對住班救生員講嘢時唔知受咗咩刺激，一開始就發揮佢「煽動他人情緒」嘅強項，話嗰啲冇參加罷工嘅救生員係支持政府嘅幫兇，形同冚大家兩巴；又話救生員罷工都係玩得唔夠激，應該效法佢多年前睇過一套由史泰龍主演、講述底特律工會抗爭行動嘅電影一樣，要將抗爭行動再升級。
跟住佢又喺度明窒長毛，話長毛會嚟聲援但係就例牌遲到。大嚿真係太過專注發表偉論，竟然唔發覺長毛已經企喺後面。長毛當時聽到大嚿咁鬼寸，即時面都黑埋，大嚿都知唔對路，即時搭住長毛膊頭，話自己同長毛係好拍檔，實行呵番佢，認真好睇。
到長毛講嘢時，佢就語中帶骨咁暗寸返大嚿，話罷工係唔使流血嘅，因為呢個係市民嘅基本權利。講兩講，長毛都係離唔開佢爛撻撻嘅本色，猛咁恥笑寫信致各救生員嘅何局長，大叫「致你老闆」，又話「你好×街」，嗌到成班救生員鬼咁開心、出晒氣。
到咗下晝，長毛重着住條短褲落埋水以實際行動支持班救生員，平時遊行示威永遠都帶頭嘅長毛喺落水嗰時都係威係勢，好似好掂咁，但冇耐竟然後勁不繼，同曾經喺三十年前考過拯溺章嘅石國強冇得比。臨到終點時，班救生員等咗五分鐘先至見到佢出力咁游埋嚟。
長毛游完水頭暈
長毛同八方講，佢好攰，又好頭暈，加上前日遊行嗌咗一日口號，喉嚨重有些少出血，最後要唞咗好幾十分鐘先至恢復元氣。長毛除咗衫游水，八方先見到佢有個肚腩，真係要多啲運動咯。不過，受到班救生員英雄式嘅歡迎，講真乜都抵番啦。
爆料熱線：29290000、27860099
報料傳真：26239278
報料電郵：[email protected]