45條關注組梁大狀官仔骨骨係人都知，但有冇人會估到，梁大狀就算去游水，都會着西裝呢？佢老友湯大狀大爆，Alan連去沙灘都會着西裝，係咪好鬼馬呢？查實Alan嗰次都係因為太趕，先至趕唔切換番套衫啫。講開游水，Alan近日落區做嘢時，順道買條新泳褲，點知個店主見到梁大狀大駕光臨，就即刻打咗九折。連買條泳褲都有折頭，Alan魅力真沒法擋。
梁大狀又的確幾掂，佢本新書喺書展賣到成幾百本，銷情好唔錯！八方聽聞佢自己都好滿意，只係對於貿發局嘅安排有啲意見。話說傑哥搞咗個簽名會，點知貿發局要擺喺出口嘅地方，咁啲讀者喺出口先見到Alan，想返轉頭買書又唔得，簽名會又話明唔准賣書，梁家傑就覺得「好冇理由」。
暑假來臨，梁大狀準備同老婆仔女星期五飛去法國玩，月底先返港。而到咗九月，呢位西九主席會率領何鍾泰、吳靄儀、陳鑑林、霍震霆、劉秀成以及譚香文去西班牙阿班多爾巴拿參觀，同當地嘅官員見面，研究吓古根漢博物館點樣令當地嘅經濟重生，即係睇吓當地政府點將賣地收益，好好注入文化事業。
爆料熱線：29290000、27860099
報料傳真：26239278
報料電郵：[email protected]