組合Twins前晚喺西貢拍攝新歌MV，趁空檔同工作人員去大埔仔一間茶餐廳食晚飯。雖然Twins兩個都做咗小富婆，不過佢哋對食嘅要求唔高，去邊度食嘢都冇所謂。
蔡卓妍（阿Sa）話好難得可以舒舒服服坐低食餐飯，佢話：「好多時我哋啲通告都係一單接一單，有時甚至連食飯嘅時間都冇，所以今日可以成班人坐低食飯真係好難得。」而鍾欣桐（阿嬌）亦有同感，佢話：「去邊度食唔緊要，最緊要係啲嘢食好味啫，大牌檔我哋都會去㗎。」
出街鎖窗花
不過嗰晚Twins所到嘅茶餐廳附近發生爆竊案，藝人唐麗球屋企俾人爆格，Twins知道後話佢哋住嘅地方保安都好嚴密。阿Sa話屋企有幾重保安，每次出門都會閂晒所有窗，連窗花都上鎖，佢話：「我屋入面有個好強嘅保安，就係我隻狗啦，佢好靈敏㗎，一聽到少少聲都係咁吠，我工人長時期喺屋企，電梯位又裝晒閉路電視。」至於同屋企人一齊住嘅阿嬌就話：「我屋企都有好多保安人員，都幾嚴密㗎，我隻狗亦都好敏感，佢聽到電話響都會不停咁吠。」
此外，阿Sa主演嘅電影《情癲大聖》噚日喺北京舉行記者會，謝霆鋒因發燒返咗香港睇醫生，得番阿Sa同范冰冰撐場。阿Sa嘅終極豬扒look喺內地首次曝光，嚇到啲傳媒嘩嘩聲。
