暑假檔期，酒店特別多搞作，天水圍嘉湖海逸酒店，連新加坡國慶四十周年都唔放過，借埋嚟做宣傳。凡四十歲、持有新加坡身份證嘅人士，今個月八至十二號，可以用四十蚊新加坡元（大約一百九十蚊港紙），喺酒店住一晚。嘉湖海逸酒店一晚最平要四百九十蚊，即係低過四折。 嘉湖海逸酒店總經理徐英略，喺新加坡做過兩年嘢，今次由當地邀請名廚嚟香港，今個周末，搞埋新加坡自助晚餐，符合以上條件嘅新加坡人士，可以用四十蚊食呢個自助餐，名額每日十個。