港股早段跟美股走軟，但好快就跌唔落，中移動（941）有高盛調高目標價，頂住大市，午前滙控（005）轉跌為升，帶動恒指升勢加速，結果全日上升97點，收報14978。滙控市後公布業績較預期理想，期指扯高至15024收市，高水46點。
倉內的恒指P輪，已按原定部署止蝕；國壽（2628）沽出一半，套現買入遠展（035）；神華（1088）再進兩毫，止賺位推上8.30元。鞍鋼（347）高收3.975元，微破中期降軌阻力，上望4.3元水平，止賺位推上3.90元。
睇期指昨日高收之勢，恒指今日早段好有機會升破萬五點大關，但趙飛雲比較保守，喺現水平實在唔敢追買C輪，尤其係恒指C輪。恒指9RSI昨日去到87.38，已經係超買再超買，短期再升當然有可能，但幅度恐怕有限。
暫時不買C輪的另一個理由係油價。上周油價從低位反彈頗快，昨日借沙地阿拉伯國王逝世消息，更一度升破每桶61美元水平。大市氣勢如虹之時，油價冇人會理；大市若要調整，則油價可能又會成為藉口。
酒店租升利遠展
遠展收報3.35元，剛好升至3月高位延伸下來的降軌阻力，若突破，短線目標3.65元，暫以跌破10日線（3.30元）止蝕。
香港酒店業協會剛剛表示，本港酒店房租由年初起逐步攀升，9月份房租將較去年升10-15%。到10月傳統旺季，房租會較9月再升10%，而入住率平均會達9成，估計租金上調趨勢會持續到11月。酒店係遠展主要業務之一，如此好景，難怪摩通對佢睇得咁好。
趙飛雲