噚日八方得閒，聽電台寶娃娃訪問咗城市電訊主席王維基，講佢做生意起家嘅經歷。原來佢讀中五時已經好有生意頭腦，趁暑假同同學夾份搞補習班，六個星期賺咗四萬幾蚊，當時七九年已經夠買一層樓！到咗考入大學讀電子系，見香港賣佢讀嘅台灣教科書食水深，於是拍心口親自去台灣買書，收晒同學啲錢後就去台灣，當地書商見佢買咁多，重畀六折，於是佢賺埋當中差價。王維基話，佢讀書其實唔叻，但要證明自己喺其他方面叻過其他同學。
八九年佢移民加拿大，揀咗做生意，認為做生意係最快融入當地社會嘅方法，最初佢喺地攤賣女裝睡衣，結果唔掂，最後都係做番自己較熟嘅行業，就係咁搞咗城市電訊。喺返香港發展前，重將幾箱女裝睡衣送去慈善機構。𠵱家嘅王維基，當然唔會賣地攤啦。
傳真︰2623-9278
電郵︰[email protected]