古巨基噚日喺新都城舉行簽唱會，吸引過千fans捧場，場面熱鬧。一向精於畫畫嘅基仔喺活動上竟然俾司儀考起，因為大會安排咗一位外籍女模身穿比堅尼，再套住件吊帶小背心出場，基仔要喺女模件小背心上面畫Kubi公仔。
基仔一見到女模着得咁性感已經緊張到滿頭大汗，最後佢選擇喺小背心嘅背面畫公仔。司儀之後又要基仔畫個Kubi公仔喺女模身上，點知女模突然除咗件小背心，淨係着住比堅尼，嚇到基仔即時彈開。基仔最後選擇喺女模手臂上畫公仔，佢好抵死咁問現場觀眾想唔想佢將個公仔畫喺啲更立體嘅地方。其後基仔同女模要穿過人群，基仔為免女模俾人偷襲，即時除咗自己身上嘅外套畀女模披住，好有風度。
栢芝新歡係醫生？
另外，張栢芝日前講笑話因為基仔將一件有感冒菌嘅外套借畀佢，搞到佢病咗，不過日前栢芝同外籍新歡撐枱腳，當基仔知道後就話栢芝個外籍新歡可能係醫生，重話有病都要去食嘢，因為一定要食飽先至食得藥。
