人人講豬瘟，冇人理播馬，港台停播賽馬嘅風波暫告一段落。不過，有關港台嘅新聞依然日日見報，而且令人睇到心寒。
唔信？隨手執幾段畀大家睇睇。七月二十號禮拜三，張寶華在專欄撰文，話幫港台拍《特區八年》特輯時，覺得問責局長對港台諸多阻撓，甚至下封殺令，同樣情況唔會發生喺其他商營電台。
七月二十三號禮拜六，林超榮又喺自己專欄度，寫佢幫港台拍《頭條新聞》，度咗一個好溫和嘅笑話笑煲呔，結果俾人刪剪咗出唔到街，超人覺得好似鯊魚俾人斬咗魚翅咁。
兩日之後，港台周一晚播《鏗鏘集》，講港大微生物學系副教授管軼研究禽流感，播出前，宣傳稿上有管軼批評內地官員嘅說話，哈哈，到播出時，又好似沙士咁忽然間消失得無影無蹤；港台解釋話係時間所限，所以刪短咗。八方真係佩服操刀嗰位大哥，落剪落得咁準嘅。
搵超人擺和頭酒
前後唔夠一個禮拜，隨手都有咁多例子，咁點做落去呢？八方問林超榮，佢就話自從○一年塔利班事件後，自己都好謹慎，不過今次個gag好溫和，如果咁都cut，真係好難做；佢又話港台方面已經請佢食飯解釋，亦明白港台處境。八方又去問港台，佢哋就話內容如果有誹謗成份嘅話，就要刪喎。
咁究竟被刪嘅笑話係講乜呢？林超榮話，大致係話「市面有兩種煲呔，一種係整定，一種要人打嘅……呢隻係阿爺打好整定畀我哋，好受歡迎，非常紮實；至於兩年之後，會唔會散掉，就要睇佢嘅實力。」呢十五秒嘅笑話都怕有事，唔怪有人話港台騰雞啦。
港台呢個困局，都唔知點收科。八方唔擔心言論自由，只係擔心啲人冇咗自由都唔知，但求非政治化，一心享受毛孟靜講嘅「愚昧的幸福」，但話時話，毛小姐嘅稿，都好似俾人刪呢。
傳真︰2623-9278
電郵︰[email protected]