咬蘋果：明昅跳水男<br>型仔街邊17米插水明益睇肉家

咬蘋果：明昅跳水男
型仔街邊17米插水明益睇肉家

前排選港男揀洲男，奀仔大隻佬掀起一股昅型男熱潮，𠵱家又有水着型男登陸本港，個個滿身肌肉、靚仔兼身懷絕技，絕對唔係話識打吓籃球耍下功夫就出嚟獻世！破天荒街頭表演跳水，由17米高台跳入只有2.5米深、約4米直徑小水池，識撲水重識得搞笑搞氣氛！喺剛過去的周末落住大雨都引到百幾人圍觀，師奶少女個個變身睇肉家睇到眼甘甘，嚟緊周末重有機會睇，就算唔睇都要知咩事，否則勁Out！
記者：馬慶武
攝影：梁細權、楊錦文

過百人擔遮圍觀

跳水表演電視播唔少，但喺街邊起個透明水池玩跳水就聞所未聞。呢班澳洲世界級跳水隊Aquaworld一連兩星期喺黃埔新天地船景街通街跳水滿天飛，加埋韻律泳同水中逃生表演，娛樂性極豐富，難得個個都係型男索女，最重要係可以免費現場近距離睇。前兩日雖然落住大雨，但都引到勁多人圍觀，現場驚喜不絕，聽到最多嘅就係：「個水池咁細，好危險喎！」、「嘩！你睇個鬼仔，好似幾靚仔喎！」、「17米咁高跳落嚟？係咪呀？」今個星期錯過咗唔緊要，嚟緊周末重有得睇，想知型男索女邊個打邊個？做定功課睇埋以下報道喇。

■水池只有足球場中圈咁大，訓練唔夠隨時跳水變跳……，自轉變自……

■無吹水，落住雨都有百人圍觀，人人擔住把遮，用歡呼聲代替掌聲。

飛插連環睇

雙腳一蹬，跳！
■由17米高台跳水，因水池只得2.5米深，表演者PeterBihun要頭上腳下插入水，重唔可以壓水花，咁先可以避免撞到池底。

打番靚空翻！

我插，成功插水！

型男索女巡禮

跳水特技員全部喺10歲左右開始練習跳水，由正規運動員轉型花式表演者，佢哋話無咁大壓力Funny好多，但搞氣氛難度拍得住凌空轉體三周半；3位靚女韻律泳手除與隊友合作無間外，還要與表演水中逃生的Michael這領隊MC合作搞氣氛。

■港男：嘩！齋Show肌肉原來唔夠㗎！

LukeJones
■澳洲國家賽3米彈板冠軍，轉做跳水特技員4年：「表演特技跳水比正規跳水比賽危險，較易受傷。」

PeterBihun
■17米高台跳水表演者：「最大技巧係要控制身體入水角度，唔可以頭下腳上直插。」

MattCooper
■最靚仔高大，同樣係國家級冠軍，就現場所見最受一眾師奶少女睇「肉」家歡迎。

MichaelLotahs
■家族成員都係水中逃生的表演者，比較成熟，但依然鍾意搞笑。

BelindaCollins
■唔只係前澳洲奧運隊成員，重曾經參與女子鐵人賽。

FayeOwen
■已經為Aquaworld於世界各地演出花式韻律泳達5年之久。

TaraCameron
■曾經喺2000年代表澳洲參加奧運花式韻律泳項目。

旱地水池2日起貨

街邊搭水池玩跳水以為好大工程？No喇！實情係上周三運材料，上周四就砌好跳水池連彈板及高台，頭搭尾只係花2日時間，你都咪話唔勁！唔止喎，重要做埋個迷你兒童水上樂園，只要在黃埔商場內消費滿$100，就可以畀小朋友參加划船仔遊戲，化骨龍有着落，可以專心睇表演喇！

■2日起貨，快到無倫。

■細路仔坐艇仔，唔阻你睇型男。

前奧運隊員搞笑玩花式

呢隊花式跳水隊，由3位跳水特技員、1位水中逃生特技員同3位女韻律泳手組成，個個都有來頭，當中有國家跳水賽冠軍級人馬，亦有前奧運代表隊成員。先嚟彈板花式跳水、再嚟韻律泳表演、水中逃生、重有跳水型男換上鬼馬小蜜蜂、消防員制服嘅搞笑Show，每場表演雖然只係30分鐘，但可以話絕無冷場，壓軸嘅17米高台跳水更加係驚險緊張，淋住雨都要睇埋先走！

其他表演

水族館韻律泳