英國有個以冒險著名嘅大企業家維珍航空老闆布蘭特，中國亦有個愛冒險嘅大企業家萬科老闆王石。佢噚日嚟香港開業績記者會，八方當然問吓佢最新嘅冒險計劃。佢話將會喺今年底去南極，同行重有香港嘅爬山專家鍾健民同成都《華西都市報》記者劉建。
佢話如果今次成功征服南極，佢哋三個將會完成「七加二壯舉」即征服七大洲高峯同兩極。𠵱家全球只有五個人做得到，全部都係歐美人士，冇中國人，好希望嚟個突破。今次會首次一同進行籌款活動，為瀕臨絕種動物籌款一百萬元人民幣。
不過作為國內上市公司董事長，佢都好明白投資者擔心佢稍有差池會影響公司業績，股價並曾因此略有波動。不過自○三年沙士期間股民得閒安坐家中睇佢成功攀登珠穆朗瑪峯後，股民對佢嘅信心就增強，公司股價亦冇再因此而上落。
傳真︰2623-9278
電郵︰[email protected]